Generationswechsel

Generazioonswäggsel säit mä in dr Biologii ere Form vo dr Fortpflanzig, wo die bäide Wariante vo dr Fortpflanzig – die gschlächtligi und die unggschlächtligi – in verschiidene Generazioone sich gegesitig abwäggsle. Generazioonswäggsel chunnt bi vile Protiste, bi Rotalge, bi Moos, Faarn und Soomepflanze vor, aber au bi Nesseldier und Tunicate. Er kombiniert d Vordäil vo bäide Fortpflanzigsarte: D Generazioon, wo sich unggschlächtlig vermeert, cha e groossi Zaal vo Noochkomme broduziere, oone drfür e Sexualpartner z bruuche. D Generazioon, wo sich gschlächtlig vermeert sorgt drfür, ass sich dr Geenpuul duet vermische.